DIA 12 XOVES. CLASES E MUSEOS

Pola mañá, as clases habituais das que pouco lles podo contar porque non estou nelas. Creo que van ben. Uns un pouco máis adiante e outros un pouco máis atrás. Uns con profes máis simpáticos e outros con menos... como a vida mesma. Hoxe démoslles as instrucións para a viaxe que emprendemos mañá. Levar mochila, calzado cómodo, roupa de abrigo, chuvasqueiro ou similar, un par de mudas, e pouco máis. Sairemos ás 12.55 de Malahide, collemos un bus en Busaras -a estación de autobuses de Dublín- ás 14 h. e saímos cara a Galway. Se cadra aínda imos nun bus nós sós... ou se cadra non. Depende. Como somos 40 porán un bus extra e pode que metan nel xente ou non. Xa veremos. En Galway estaremos sobre as cinco e media da tarde, no Hostal Kinlay, repartiremos os cuartos e iremos dar unha volta polo centro do lugar ata as 19.30 que temos a cea nun restaurante. O sábado ás 9,30 cóllenos un bus no Hostal e lévanos ao lugar desde onde sae o barco a Illa Maior de Aran (Inis Mor), ás 10,30. Ás 11,15 chegaremos á illa e ao pé do peirao agárdanos un bus pequeno e unha furgoneta para facer o percorrido pola illa dunha 3 ou 4 horas con paradas en seis puntos interesantes. Mirado o tempo, creo que o sábado será mellor có domingo e có venres. Hanos cumprir porque Aran, polas fotos, é como o Cabo Prior ou Vilán ao besta. No Hostal de Galway existe wifi, pero non imos carrexar o ordenador ata alá así que, se non hai outra cousa, non creo que poidamos facer o blog nos dous días que veñen, por iso lles conto hoxe os plans de futuro. Hoxe, volvamos ao rego, Carmen foi cos “novos” ao Museo Arqueolóxico. Só estaba visitable a primeira planta -a máis interesante para min, orfebrería céltica, etc.- porque o outro día caeu nun museo unha escaleira e pecharon todoas as plantas superiores dos museos para revisar as subidas. Despois do mesmo, foron a ver a estatua de Oscar Wilde que existe na esquina de Marrion Sq. e famoso polas súas frases, e logo pasearon polo Prado de Santo Estevo – ou Saint Stephan Green- para rematar na rúa de Garfton, que é como o Paseo en Ourense. Os outros, os que xa estiveran o ano pasado no Arqueolóxico, foron con Afonso ao Museo de Arte Contemporánea. Algunha cousa interesante –a exposición de Lucian Freud, o neto de Sigmond e moita trapallada. Moitas salas pechadas, pero en inmellorable localización. Depois fomos ao encontro dos outros onde a estatua de Molly Maloon e dispersámonos para o late nite shopping, ata o momento de volver a Malahide. A chuvia respectounos de novo.

Eva Rodríguez González, que non quere fotos.

Ágata e Natalia, piden foto no tren